Matthew 26

Una kerman kambono Jisas to gopon we dji

(Mak 14.1-2 ne, Luk 22.1-2 ne, Jon 11.45-53)

1Jisas kandja embe dje woro kere, kogoye una moi al embe dji, 2ye kaninj, ege soka wor pundaka ege kerman Pasopa ge yenda. Una wo Una Wombe i kunda yem una auneke kambono ipo iko pera al nil to goye we dji.

3Opa gale awinj una kerman ne, Juda una kerman ge moi. Opa gale awinj una kerman moi iwa kandjiye Kaiapas we dji ge yene numbiye al ga wo molo makai to moi. 4Ga kende kulo Jisas kaye to, to gopon dje kandja begle moi. 5Kambono embe dji, ege kerman yenda kune ge Jisas kaye to naimbon; una kunda kakne we dji.

Ana ta wo Jisas ngambale al kopong yei

(Mak 14.3-9 ne, Jon 12.1-8)

6Jisas dumo Betani po iwa Saimon numbiye al moi. Saimon ge asa kenj kalanj toi. 7Jisas kwa no moika, ana ta ku nume ta iwi. Kopong nume al moi ge mirang wopake ye, ku kerman ke boi kopong. Ana wo Jisas ngambale al tulu dje woro kopong yei. 8Jisas kogoye una kane ellne kumbsi, namba yei pille kopong iwo kiwa tulu dje wordo ne? dji. 9Nono kopong i ku kerman bolo, i una wal kane nanonj una aupinka kune yeika we dji.

10Kogoye una nomane embe paika une embe dji, ye namba yei pille ana ge kandja embe dje awinj? Ana ge na ye wopake ye aundo. 11Una wal kane nanonj una ege ege ye boll moye paro. Ba na ye boll ege ege namoyo. 12Ana na kopong ye aundo ge na goyaka, una gull tane ge, une na gaklena amblokun yeno dje pille yendo. 13Na kandja dje ye aundo, una po na kandjinambe wopake dje una awo pine. Dumo porapora pine al ge, ana kopong embe yendo ge djineke, ana ge we dje pille moye we dji.

Judas una kerman moi al po Jisas kaye tane mal pille kandja dji

(Mak 14.10-11 ne, Luk 22.3-6)

14Jisas kogoye una 12-pela moi ge taimanta Judas Iskariot moi. Une Juda una opa gale ye awi una kerman moi al po embe dji, 15na Jisas iwo ye aglene al awill dal, ye na wal naral wal aune ne? dji. Kambono ku silpa 3-pela ten (30) i Judas awi. 16Aumaka Judas kondwe ta kane i Jisas ipo kambono aglene al worno dje pi.

Jisas kogoye una boll kwa noi

(Mak 14.12-21 ne, Luk 22.7-14 ne, 22.21-23 ne, Jon 13.21-30)

17Juda una ege kerman kandjiye, Bret gale yis pakna napai ege kerman ge yei. Ege kerman ge yeno dje yeika, kogoye una Jisas moi al wo embe dji, ege kerman, Pasopa kwa namben ge no po namkond amblokun yembon dje pren ne? dji. 18Jisas embe dji, ye Jerusalem po kanne, iwa ta moya. Ye po embe djine, tisa embe dji, na egena er manda wondo. Na kogena una boll wo ni numbin al kwa kerman Pasopa nambon we djime dji. 19Jisas kandja dji mal kogoye una po kwa mokna gale amblokun yei.

20Emill kindja djika, Jisas kogoye una 12-pela boll kwa no molmaka, 21une embe dji, na kandja kaima dje ye aundo, ye mor al ge una taimanta wo na ipo kunda yem una mor al aunda we dji. 22Djika ga kamalne ngundjo pille molmaka ta ye molo, ni na pille djinden mo? djika, ta ye molo, ni na pille djinden mo? djika embe dje moi. 23Djimaka Jisas embe dji, iwa ta na boll bret i plet al to balo aike namboll iwa ge, une na ipo kunda yem una aunda. 24Una Wombe to goye we dje Baibel al bolo pagi ge kaima panda. Ba iwa dje ipo kunda yem una aglene al worda iwa ge, God tonda. Une me nakuika une wopake moika we dji. 25Judas Jisas dje ipo kunda yem una mor al aunda iwa ge une Jisas moi al embe dji, tisa, ni na pille djinden mo? dji. Djika Jisas, ni dje kune yenden we dji.

Jisas kogoye una bret ne, wain awi

(Mak 14.22-26 ne, Luk 22.15-20 ne, 1 Korin 11.23-25)

26Jisas kogoye una boll kwa no molmaka, Jisas bret ta i God wopake we dje awo, tuklo kogoye una awo embe dji, ye i nome! Ge na gaklena we dji. 27Nu wain kap al moi ge Jisas i God wopake we dje awo, kambono moi al awo embe dji, ye porapora kap ge i nome! 28Ge na meyamna. God yene kandjiye dje gopa to pagi mal ge, na meyamna tulu djinda. Tulu djinda al ge, una merke singare ke ye waninj ge God kere aunda. 29Na kandja dje ye aundo, na ipon nu wain nondo ge noll pora djindo. Are Nena dumoye wopake yero al na ye boll moyaka, nu wain kindja moya ge nambon we dji.

30Djika kambono lotu gollang ta dje er bekle po dumo mekbe Olip yei al pi.

Jisas embe dji, Pita ni na kere seke ben we dji

(Mak 14.27-31 ne, Luk 22.31-34 ne, Jon 13.36-38)

31Jisas embe dji, ipon imina pundaka una wo na taneke, ye na kere seke pine. Baibel bolo wori pai ge embe dji, kog sipsip tau moi iwa ge na to goyaka, sipsip seke er djelldjell pine we dji. 32Ba asamoll na golo agle er wo gun po distrik Galili po moyaka, ye are wo na kanne we dji. 33Pita embe dji, una porapora ni kandjin pillgi djine ge kere seke pine, ba na ni nakerno we dji. 34Djika Jisas embe dji, na kandja kaima dje ni aundo, ipon imina pakna pundaka, kune sokara na Jisas nakando we djimbenka, are ka kondwale yau tonda we dji. 35Djika Pita embe dji, na ni boll aike gopoll panda, na goyo. Ba na ni nakando we djino ge, man we dji. Pita kandja embe dji ge kogoye una porapora kandja karkar eri dji.

Jisas dumo Getsemani po kamang yei

(Mak 14.32-42 ne, Luk 22.39-46)

36Jisas kogoye una boll er dumo Getsemani pumaka Jisas embe dji, ye ba molme! Na kola po kamang yeno we dji. 37Pita ne, iwa Sebedi wariye soka aike dje i pi. Jisas pille urup kerman djika, 38une embe dji, na nomana urup kerman djindo, na goyo mal pille yendo, ye na boll kane kane molme! dji. 39Dje kere une yepall ta er kola po yene yage makimb al taimagaus pa molo kamang ye embe dji, Nena, ni kapla we djin dal, una wo na to nagoye! Kap ▼

▼26.39Jisas kap we dji ge, une yene imb kakda mal pille dji.

ni na aunden ge iwore! Na nano napro. Ba na nomana paro mal ni nayemben, ni nomanin paro mal yemben we dji.

40Une kandja embe dje kere er yem wo kani kogoye una ou pa molmaka, une Pita moi al embe dji, Pita, ni na boll wan awa molo kane mopen ge kune nayendo mo? 41Ye kamang yene. Satan ye kamalne tondaka, ye kulngab yage djine. Una nomane al wal yembon dje piye ba, gaklene al yembene napanda we dji.

42Jisas alla er yem po kamang embe yei, Nena, ni na kap aunden ge na nano napro. Ba alla, ni namben we djin dal, na nano we dji. 43Une er yem po kani kogoye una ou dall pa molmaka, 44Jisas kere alla er yem po kune soka kamang yei mal ge, une alla po kamang yei.

45Une alla yem wo kogoye una moi al embe dji, ye kiwa molo ou eri pa mopon dje pir mo? Na makimb al moll pora djindo. Ye kanme! Iwa ta wo Una Wombe i singare ke yenj una mor al worda ege ge ipon yero. 46Ye aglme! Iwa na embe yenda we djill iwa ge une woi pora djindo. Nono po kanbon we dji.

Judas wo Jisas i kunda yem una awi

(Mak 14.43-50 ne, Luk 22.47-53 ne, Jon 18.3-12)

47Jisas kandja kindja i pla woro djika, yene kogoye una 12-pela, ta Judas we dji ge une una merke dje i Jisas moi al woi. Opa gale awi una kerman ne, Juda una kerman kambono dje wormaka, una wo djebainat amblo, kapill kerman boro iwi. 48Asamoll Judas ga moi al embe dji, na po iwa ta djillake to nano iwa ge, ye wo kaye to i er pume! dji. 49Ola dje Judas Jisas moi al wo embe dji, Tisa, emill dji wopake we dje Jisas djillake to noi. 50Jisas embe dji, agana, ni wal yeno dje wonden ge, yeye! dji. Djika una wo Jisas amblo to kaye toi. 51Jisas boll aike moi iwa ta djebainat i toika, iwa ta kamale bolo kelip to yage kal toi. Iwa ge opa gale awi iwa kerman boiye. 52Jisas embe dji, ni djebainat i yem woro pagle! Una djebainat i kunda bolo wane moye ge yenekne kunda boye al ge dje bolo goye. 53Na Nena djinaka une tau agelo una merkeke dje wordaka, kambono wo na pak to aune. Une dje naworda dje ni djebainat tonden mo? 54Ba alla, Nena ni na amblo pille dje aumben we djinaka, tau agelo wo na amblo pille dje awi dal, Baibel bolo wori paro ge megiye natonda we dji.

55Kune ge una merke wo moi al ge, Jisas kandja embe dji, na kunumb una namoro ba, eine wo kunumb una tonj mal ge, ye djebainat ne, kapill tumge iwo na tambon dje yenj. Ege ege na ye boll, lotu numb kerman gull al pakna molo kandja dje awill, ye na natoi. 56Ba ye ipon wo yenj ge, propet Baibel bolo wori pai ge megiye tonda dje pille, yenj we dji. Jisas kandja embe djika kogoye una porapora kere seke pi.

Jisas kot ye awi

(Mak 14.53-65 ne, Luk 22.54-55 ne, 22.63-71 ne, Jon 18.13-14 ne, 18.19-24)

57Una Jisas dje ipo opa gale awi iwa kerman Kaiapas numbiye al pi. God loye dje awi una ne, Juda una ngambalne pai una ge asamoll wo makai to molmaka, 58una Jisas i pi al Pita are eprap ye pi. Kaiapas numbiye gull pai al ge Pita er pakna po, eine una moi al po ami dje moi. Una Jisas ipo yene mal une kanno dje yei.

59Opa gale awi una kerman ne, Juda una kerman kot kerman dji al ge, ga una pende dji wo molmaka, ye kende kulo djineke, Jisas wambo ta paro we djineke to gopon we dji. 60Una merke wo kandja kende kulo dji ba, Jisas singare ke ta yei ge kambono kane nai. Ba alla, are iwa soka wo kandja embe djipill, 61Jisas embe dji, na God lotu numb kerman sellke i worno we dji. Ege sokara wor pundaka na alla gun takno we dji. 62Kandja embe djipillka opa gale awi iwa kerman ge agle molo embe dji, Una ni embe yen we djinj ba ni kandja ta dje yem naworden we dji. 63Jisas kandja ta dje yem nawori pille, iwa kerman ge embe dji, God gun moro iwa nale al kaima we djimbena no pupon, God wariye dje worda Krais we dji ge ni wale won mo?

64Djika Jisas embe dji, ni kune djinden, na wale moro. Ba, na kandja dje ye aundo, Una Wombe God yembe dongall pai iwa agle woto ami dje molo, kam kupa boll kal makimb al wonda ge, ye kanne we dji. 65Jisas kandja embe djika iwa kerman tukiye ke toika, yene koniye kunomiye amblo ball dje embe dji, iwa ge God kandjiye abi pora djindo. Una gun ta wo kandja nadjine, une dji ye pille pora djinj. 66Ye namba we dje pir ne? dji. Djika ga embe dji, une to gopon mal djindo we dji. 67Dje kere wo Jisas gume al kungo to, amblo ye ke kaima ye awo, pende ellda g to embe yei. 68Ni Krais moren, ni kandja propet djimbena pupon, una ne mal wo ni tonj ne? dji.

Pita, na Jisas nakando we dji

(Mak 14.66-72 ne, Luk 22.56-62 ne, Jon 18.15-18 ne, 18.25-27)

69Kot yei al ge Pita bekle to moika, boi ambo ta wo embe dji, Jisas dumo Galili iwa ni boll wani iwa moren we dji. 70Una porapora moi al ge, Pita man, na Jisas boll namoll. Ni djinden ge na nakando we dji. 71Pita gull djillake al pika, boi ambo ta kane po una moi al embe dji, iwa ge Jisas dumo Nasaret una boll aike wani iwa we dji. 72Ba, Pita, man we dji. God nale al na kandja kaima djindo, iwa ni djinden ge na nakando we dji. 73Yepall ta moika una agle moi ge Pita moi al wo embe dji, kambono epilene moi ge ni kaima moren, Galili una numbkane pai mal ni dje kune yenden we dji. 74Pita kaima dje embe dji, na kandja kaima djindo. Na kende djino ge God na tonda. Ye djinj iwa ge na nakando we dji. Une kandja embe dje kerika ka kondwale ola dje yau toi. 75Toika Pita pille Jisas, ni kune sokara na nakando we djimbena, ka kondwale yau tonda we djin mal ken dje pille, er orko po kimb meme mugo yei.